Dicinu…ca è la notti di li stiddi,
e ju li vidu ddà tutti affuddati…
scinninu ‘n terra a spargiri faiddi
e dùnanu disii nta li nuttati.
A tia ti trovu ddà, a lu to locu,
e quannu jisu l’occhi pi taliari
tu tremi comu ciamma di lu focu,
ma tu nun scinni, nun ti vo’ stutari.
Tu si’ la stidda me, la chiù splinnenti
e quannu po’ la notti si fa scura
ju cercu la to luci…sii prisenti!
abbrazzami e di mia pìgghiati cura.
Fidata stidda, venimi vicinu
cuntariti ti vogghiu li me peni,
illuminalu tu lu me distinu..
dillu ca puru tu vo’ lu me beni.
Arcangela Rizzo
p.s.
Mancu st’annu voli scinniri, nun si voli stutari
voli stare ddà, ‘ccussì mi teni d’occhiu⭐!
di Arcangela Rizzo