MASTRU PETRU
di Maria Cristina Guarino
Li Siciliani anziani sannu ca lu dittu ’’MASTRU PETRU’’ àvi a chi fari cu lu mastru-picuraru e cu lu so vastuni (chiddu ca lu picuraru teni sempri ‘n-manu: sia comu appoju, sia comu arma cu la quali, ‘n casu di bisognu, po difènniri li so’ pecuri).
Lu Vangelu cunta ca Gesù (lu bonu Pasturi) affida’ a Petru (apostulu e primu Papa di la Chiesa nascenti) lu compitu di pàsciri li so’ pecuri (l’autri apostuli, ma puru nuatri);
pir chissa raggiuni lu vastuni fu abbinatu a Petru e di allura sinu a ora li ritratti di li papi, di li re, di li pirsunaggi mperiali (nsumma li genti chiù ‘mpurtanti di la storia) sunnu raffigurati… nun sulu cu la curuna (o la tiara) ‘n testa, ma puru cu lu scettru ‘n-manu: un vastuni prizziusu, signu di lu putiri rigali o di la dignità ecclesiastica; papi e viscuvi teninu ‘n-manu lu Pasturali nta li cirimonii ufficiali; li statui e li quatri di San Giuseppi lu raffiguranu cu na virga ciuruta ‘n manu;
pirsinu li carti di li Tarocchi hannu figuri dutati di vastuneddi. – Un vastuni, ‘n-qualunqui modu si prisenta (palora, figura o ricordu) fa puru pinsari
a li vastunati spittanti a tutti chiddi ca mancanu di rispettu a li putenti di turnu e pirtantu, dicennu a qualcunu: << Vidi ca veni Mastru Petru! >> lu si voli ammuniri a cumpurtarisi currettamenti.
A cunclusioni di stu discurseddu riguardanti Mastru Petru (e lu vastuni) li vicchiareddi d’ora ricordanu ancora la bacchetta usata (sinu a l’anni ’’50 -’’60 di lu
seculu XX) pi cumminciri l’alunni nigligenti a studiari e li apprennisti reticenti a travagliari, li quali finìanu pi identificari (e macari cunfunniri) lu maistru cu la so bacchetta e lu mastru cu lu so vastuni: strumenti nta li mani di chiddi pirsuni ca duvivanu esseri ascutati e obbediti, masinnò… vastunavanu!
Ringrazio Siculomania per avere ancora una volta apprezzato e pubblicato un mio brano (breve, ma significativo) che fa parte di una silloge di racconti (inizialmente scritti in lingua italiana) alcuni tra i quali (i più brevi) ho poi tradotto in lingua siciliana (con l’aiuto del Vocabolario di Vincenzo Mortillaro, Marchese di Villarena, gentilmente inviatomi online dall’Accademia della Lingua Siciliana). Cordiali saluti. M. Cristina Guarino
Ringraziamo lei per i preziosi contributi che ci consentono di arricchire l’archivio delle nostre memorie.