Tuttu addumanna amuri,
allura tu pirchì si’ amariata?
Fici ‘n subissu pi lu to surrisu…
E si ora mpidisci a na làcrima
di cascari di l’occhi to’,
ju la pigghiu e la ritornu subitu
a la to biddizza,
sbalancannu la finestra di casa
e lassannu nèsciri fora
na stizza di lu to amuri,
‘n attimu di lu to ciatu
e tanticchia di sintimentu.
Talìa comu li stiddi, ammirannuti,
trascinanu a iddi l’annuvulatu celu
ammucciannusi.
Senti comu lu ventu
s’affirragghiavu a lu to ciatu
addivintannu ammizzigghiatu.
Si’ accussì bedda ca Luna e Suli
taliannusi nta l’occhi, diciunu:
“Grazii!”
Eccu pirchì tuttu chiddu ca esisti
addumanna amuri,
pirchì tutti nicissitanu di biddizza.
Quantu chiù ju ca ti sugnu innanzi e t’amu.
di Alessio Patti (Catania, 23/10/2022)